【Emily】港鐵復刻「白頭」列車 明午彩虹站開出 軒公復刻陳百強 唱「地下鐵碰着她……」

【明報專訊】港鐵為慶祝45周年，大玩懷舊主題，預告復刻版「白頭」主題列車聽日（周四）下晝約1點50分會現身彩虹站3號月台，準備喺兩點「首航」，車廂內會重現1980年代列車嘅「波波扶手」，詳情今日公布。除此之外，「白頭列車」喺周六（24日）上晝10點45分至中午12點，將會停泊喺彩虹站月台畀公眾「打卡」。鐵路迷聽到呢個消息表現雀躍，有人仲提出港鐵應該提供列車行駛嘅時間表，亦有人就話列車應該係行駛觀塘線。

重現波波扶手 周六泊定供打卡

港鐵另有其他懷舊宣傳招數。一提及有關港鐵嘅經典歌曲，自然會哼起「地下鐵碰着她」。港鐵搵咗「軒公」張敬軒拍宣傳片，翻唱已故歌手陳百強嘅名曲《幾分鐘的約會》，陪伴觀眾「穿梭」港鐵嘅時光隧道，片中節錄同鐵路有關嘅電影場景，包括電影《緣份》、《三人世界》 、《下一站天后》 、《幻愛》等。

鐵路迷專頁「Riders」亦爆料，話港鐵公司行政總裁金澤培向員工透露咗計劃今年餘下時間嘅慶祝活動，話除咗會有流傳已久嘅復古「白頭」列車本周推出，9月底更會喺中環海濱舉辦鐵路主題嘉年華。