【明報專訊】大熊貓盈盈生咗一對龍鳳胎，海洋公園主席龐建貽話有朋友建議改名「家朗」或「旻憓」，讚呢個提議都幾有創意，但佢話日後一定會畀全港市民為大熊貓BB改名。
龐建貽接受now新聞台節目訪問，話兩隻BB現時情况穩定，但仍然好脆弱，要再等幾個星期先算真正穩定，之後會考慮直播BB生活。
對於擴建大熊貓館，佢話由於大熊貓數目將增至6隻，令到海洋公園「重生方案」有變，原定山下嘅零售餐飲區域要重新規劃。佢話山下近地鐵站園區係平地，位置方便，又話有人提過將6隻大熊貓分散，吸引遊人去公園唔同地方，但佢話要考慮好多因素，例如山上斜坡較多，如果新建大熊貓館係咪要將舊嘅清拆等，各項因素都要諗。
