【Emily】開篷吹亂髮 眾將梳又紮 霍會長即席變番all back搶fo

【明報專訊】噚日朝早天陰有驟雨，又撞正打工仔返工日子，但政府同港協暨奧委會就「毋懼風雨」，安排15位奧運港隊運動員同港協代表坐開篷巴士巡遊港九新界。開車無耐，唔少運動員就被強風吹至披頭散髮，其間重劍金牌得主江旻憓、自由泳兩銅何詩蓓都紮起頭髮「抗風」；坐頭位嘅港協暨奧會長霍震霆仲意外成為焦點，至少兩度拎起把梳，整理番個招牌all back頭示人。不過，一眾運動員仍然精神奕奕向沿途市民揮手。

網上都有人評論，點解慶祝巡遊會揀閒日早上，而唔係假期或晚上放工時間。康文署早前話，唔少運動員喺奧運後都要往外地或內地訓練，政府考慮運動員訓練同比賽嘅日期同時間後，決定巡遊日期。

一班議員噚日亦化身小粉絲，喺立法會綜合大樓「鼓底」親自迎接港隊。民建聯議員顏汶羽就把握機會拎咗件Tee，收集到江旻憓、何詩蓓同乒將杜凱琹嘅簽名；經民聯梁美芬就特意同中國人民大學法律系師妹江旻憓打卡。

實政圓桌田北辰就搵何詩蓓傾偈，話好記得4年前同何詩蓓傾偈，何當年講自己比賽嗰陣跳落池就只望住池底，只會做好自己，亦希望每一次比賽都比上次發揮更好。田二少話，何詩蓓好驚訝佢仲記得咁耐之前嘅對話。