【Emily】大頭蝦記錯返港時間 蝦皮獲老竇批准下年再參賽

【明報專訊】香港首位喺寶可夢世界錦標賽嘅手機遊戲《Pokémon GO》奪冠嘅16歲青年「蝦皮」鄭業楷，前晚喺美國夏威夷凱旋返港。蝦皮接受傳媒訪問形容奪冠「好不可思議」，勉勵港人「Nothing is impossible，有夢想不妨試吓，努力博盡去追啦」，「追嘅話可能會成功，但唔追嘅話就一定會後悔」。

蝦皮「大頭蝦」記錯日子，一度以為噚晚返港，即使10多名家人同朋友臨時趕去機場，都帶齊應援牌接機。蝦皮話好開心同好興奮，「呢刻最想返屋企瞓番一覺，第二朝食番個香港早餐」。

有稱打機「毒」 蝦皮：專注做事

對於外界認為打機等於「毒毒哋、宅宅哋」，佢就話見仁見智，「可以話係毒毒哋、宅宅哋，都可以話好專注好認真喺呢一件事上面，對呢件事付出好多」。

蝦皮明年應考中學文憑試（DSE），返港後要應付學校考試至本月底。蝦皮父母為仔仔奪冠開心同驕傲，爸爸話支持仔仔明年再參賽，仲話考完DSE後「去多個旅行再去（比賽）都得」。Pokémon GO港隊前領隊張樂行就答謝蝦皮父母，感激佢哋相信自己唔係壞人，並支持蝦皮比賽，成就呢位「世一」。