【Emily】故宮館「中華溯源展」 史前龍形玉器有得睇

【明報專訊】香港故宮文化博物館下月起推出「中華文明溯源」展覽，展出近110件新石器時代至夏代嘅珍貴考古出土文物，其中16件仲係國家一級文物，包括可視為中國最早呈現龍形象實物之一嘅龍形玉器、玉琮同青銅斝等，大部分都係首次喺香港展出。

多媒體裝置 重現史前遺址

展覽時間跨度由新石器時代中晚期至夏代，即距今8200至3500年，分為三大單元展出，當中嘅陶器、玉器、石雕、骨器同青銅器等都來自9個考古文化，以及9個主要考古遺址。首單元「文明起源」重點展品包括花葉紋圜底罐、勾雲形玉牌飾等；第二單元「文明形成」就有蟬形指環、玉虎、陶鼓，同來自石峁遺址嘅神人對虎紋石刻等；最後單元「文明發展」重點展品為青銅鈴，展示距今3800至3500年嘅二里頭文化。

另外，展覽亦以多個多媒體裝置重現中國目前史前時期規模最大城址之一「石峁遺址」。展覽期間，博物館仲會舉辦親子考古工作坊等活動。展期由下月25日至明年2月7日，成人門票100元，特惠門票50元，聽日起公開發售。