【Emily】醫局大馬招聘護士 話反應正面

【明報專訊】上月中立法會通過修例，開闢新途徑引入非本地培訓護士，醫管局星期一同二（19、20日）就去到馬來西亞吉隆坡招聘。醫管局聯網服務總監鄧耀鏗話，活動反應好正面，唔少參加者都有興趣來港發展，未來會到更多國家同地區舉辦招聘活動，盡力招攬更多非本地培訓護士，紓緩公院服務壓力。

醫管局代表團喺吉隆坡舉辦招聘簡介會，同當地護士見面交流，衛生署代表亦透過線上形式參與。代表團仲參觀咗吉隆坡嘅醫療機構，並透過駐雅加達經貿辦安排，同當地大學護理系代表會面，探討合作推展唔同形式嘅護理人才交流計劃。

醫管局話陸續就非本地培訓護士職位公開招聘，接獲唔少申請同查詢，處理緊相關申請同查詢，稍後會安排合資格申請者面試同其他後續安排。