【Emily Online】高永文憶兒時玩合唱團唱得好高音 「唔係普通歌嚟」 (19:38)

行政會議成員高永文今日（24日）出席一個合唱節活動，回憶起自己細個玩合唱團都唔容易，仲笑話「嗰陣我唱嘅歌都唔係普通嘅歌嚟㗎」、「好高（音），都唔係低（音）」。佢覺得小朋友自幼加入合唱團係好事，可以慢慢觸摸自己合適嘅音域，又可以同其他小朋友合唱。不過高醫生就無即場開金口嘞。

由香港合唱新力量舉辦「香港校際合唱節」（HKICF）今年同由香港醫生有份創辦嘅慈善機構 「目養計劃」 （New Sight）合作，畀遠在非洲剛果嘅學生同香港、內地，同挪威共50間中小學、超過2千名師生合唱，仲錄影成「線上合唱團」，用歌聲支援目養計劃在非洲剛果建立第一所眼科醫院。HKICF今日就搞咗個線上合唱團暨參加者成長短片首映禮，高醫生致辭時就話，「目養計劃」喺非洲嘅眼科慈善工作，令佢深受感動：「目養計劃幫助有眼疾嘅非洲人民重見光明，富有意義。」

主辦機構香港合唱新力量主席孫承裕先生就形容今次合作「破天荒」，由目養計劃喺剛果安排拍攝同統籌，佢哋就喺香港邀請本港、深圳及挪威嘅學校錄製主題曲，跨越地域界限。喺香港土生土長嘅目養計劃共同創辦人宋黃凱欣醫生，現時喺非洲剛果建立第一所眼科醫院，預計今年年底落成。