【Emily】渝深港班列貨物3天到 局長話鼓舞

【明報專訊】香港葵涌碼頭近年貨運量排名下跌，但近日都有個好消息，上周五有一艘貨船由重慶運載貨物抵達，經葵涌再轉運外地，開啟重慶與香港和深圳港口嘅貨運圖定班列「渝深港圖定班列」。運輸及物流局長林世雄話，對葵涌碼頭能進一步拓闊貨運腹地感到十分鼓舞。

運輸及物流局話，內地西部地區工業發展蓬勃，生產唔少貨物出口外國，佢話以往呢啲貨物要靠河運接駁海運模式，經長江運到上海再上船，需時動輒以星期計，而重慶貨物來港貨運時間就可縮短到3日。

今次物流合作涉及重慶、深圳及香港。以上周首發為例，首趟滿載汽車配件、電子產品等貨物嘅「渝深港固定班列」火車於8月20日上午從重慶出發，8月22日抵達深圳鹽田港，8月23日中午以貨船運抵葵涌貨櫃碼頭，實現到成渝貨物3天內抵達香港嘅目標。林世雄話，貨物固定班列開通，正係香港「背靠祖國、聯通世界」嘅絕好例證。