【Emily】徐英偉申退黨 民建聯：盼建港報國征途續並肩

【明報專訊】前民政事務局長、現任香港酒店業主聯會執行總幹事徐英偉（圓圖），噚日同入黨多年嘅民建聯「分手」，正式提出退黨。Emily向黨主席陳克勤了解，民建聯就回覆話，噚日中午收到徐英偉退黨嘅申請，「陳克勤主席將會商約徐先生了解，希望未來在建設香港、報效國家的征途上，民建聯能與徐先生繼續並肩而行」。

Emily噚日WhatsApp徐英偉，想了解佢退黨嘅原因，但佢就未有回覆喇。徐英偉係民建聯資深黨員，佢出任政治助理、副局長及局長期間，一直保留黨籍，更喺2015年一度傳出佢會離開政助職位，返去民建聯做總幹事，但最終佢留喺政府，其後仲做埋局長。不過，徐英偉喺2022年疫情政府嚴控民眾聚集嘅期間，出席時任港區人大代表洪為民嘅生日派對，就喺因為呢次「洪門宴」，徐英偉喺當年1月請辭離開政府。

徐英偉近年以另一身分出現，除咗為酒店業界工作，亦熱心體育，出任中國香港足球總會副主席，仲有上電視台評述奧運，並出任中電客戶諮詢小組成員。