【Emily】「性衝動去打羽毛球」衝出國際 《紐時》話「多得教育局 約會下半場有新講法」

【明報專訊】初中「公民、經濟與社會科」嘅性教育教材近期成為本地熱話，其中提及面對異性有生理反應時，學生可離場「到運動場打羽毛球等」，更加成為最新潮語。最近事件亦衝出國際，美國《紐約時報》同韓國傳媒都有報道。

《紐時》以「要抵抗性衝動？香港叫青年去打羽毛球」為題報道，提及香港年輕人覺得性教育教材事件有趣（amusing），又話兩岸三地嘅後生仔運用唔同字眼，表達約會後想「有下文」，例如喺外國被邀約返屋企睇隻貓打筋斗，就可能要小心，文中仲話「𠵱家多得教育局，又有新嘅講法流行。『我想同你打羽毛球』一詞，意義從此不一樣」。

報道又引述香港議員同教育界人士質疑教材係倒退，但港府企硬立場。《紐時》中文網都有翻譯報道。

韓媒引網民：變港版「Netflix and chill」

《韓國經濟日報》就以「男女獨處時現性衝動的話，去打羽毛球」為題報道，形容事件引起香港社會嘩然，網上出現帖文質疑思維過時。報道又引述網民諷刺話，邀請人打羽毛球成為港版「Netflix and chill」，即係比較委婉方法提出性暗示。