【Emily】讚《悟空》展軟實力 唐唐：港文創業亦成支柱

【明報專訊】電子遊戲《黑神話：悟空》近期熱賣，為國產產品爭光。全國政協常委、西九文化區管理局董事局主席唐英年噚日喺南京推廣香港時，都以《黑神話：悟空》做話題，話遊戲背景取材中國「四大名著」之一嘅《西遊記》，遊戲大賣展現中國軟實力之餘，仲創造龐大經濟效果。唐英年並乘機推銷香港都有軟實力，話香港嘅文化創意產業已發展成為經濟支柱之一，當代藝術交易方面更「超英趕美」，成為全球第二大中心。

貿發局喺南京舉辦「SmartHK蘇港高質量發展合作大會」，財政司長陳茂波、唐英年及貿發局主席林建岳等出席。

唐英年提到，香港文化產業優勢喺2022年佔本地生產總值（GDP）4.5%，就業人數佔6.1%，相信可見未來可以再翻一番，佔GDP超過10%。

陳茂波就鼓勵香港同江蘇合作，除咗文創，佢話江蘇已培育出一批具備核心競爭力嘅創新企業，例如醫藥企業、人工智能公司，佢話內地前沿科技企業可以香港做平台，拓展國際業務和融資，特區政府會樂意配合。