【Emily】話粵車南下泊車安排廢 田二少：點吸內地客？

【明報專訊】商務部長王文濤日前來港出席「三中全會」宣講會，提及香港可利用港珠澳大橋推進「粵車南下」，釋放大橋潛力，發展區域經濟。港府已計劃安排「粵車南下」停泊喺港珠澳大橋人工島，但立法會議員田北辰話呢種安排「幾廢」，難吸引內地有錢人揸車南下；仲話向政府反建議，喺欣澳站旁建大型停車場畀內地車停泊，先方便到內地客轉乘鐵路去迪士尼玩、去市區購物。田二少話官員同佢講會考慮呢項建議。

田二少同Emily講，據佢了解政府已經規劃緊「粵車南下」安排，年底公布，但政府要求內地車主喺港珠澳人工島禁區範圍內泊車，然後辦入境手續，再轉巴士等交通工具去市區。佢質疑個安排唔知有咩用，點算係「粵車南下」？話港人「港車北上」好方便，買到成車貨品返港，但「粵車南下」就做唔到吸引內地客來港消費。田建議喺欣澳站做中轉停車場，方便佢哋轉乘港鐵出市區消費，購物後回程可將貨品放上私家車，舒舒服服人車一齊過關，咁至少多啲誘因鼓勵內地客南下玩。佢話三中全會叫大家改革，政府思維都要突破一下。