【Emily】南昌社區客廳開幕 義工陪學童溫書

【明報專訊】實用面積約2200方呎嘅南昌社區客廳噚日正式開幕。政務司長陳國基話深水埗係劏房戶最集中嘅地區之一，相信新嘅社區客廳連同已投入營運嘅深水埗社區客廳，可服務至少750個劏房戶，全年約12萬人次。佢仲話土瓜灣社區客廳目前正試行營運，遲啲開幕，4間社區客廳未來共可服務至少1750個劏房戶，全年共約27萬人次。

陳國基話南昌社區客廳嘅主題係「家一點」，體現到社區客廳為劏房戶帶來「家」嘅感覺，而且設計實用、溫馨，配套亦好齊全，例如有洗衣機同乾衣機，又有義工陪小朋友溫書、做手工等。佢感謝恒基響應政府呼籲提供場地同裝修，而聖雅各福群會就全年無休咁營運，形容係政、商、民合作嘅最好典範，噚日恒基主席李家誠同太太李徐子淇都有出席開幕禮。