【Emily】新民黨區議員 倡再設小組傾長遠地區經濟

【明報專訊】各區議會今屆成立「提振地區經濟專責工作小組」，但踏入下半年多區「夜繽紛」活動驟減。新民黨噚日舉辦區議員茶敘，東區嘅郭浩景話目前小組主要討論政府建議活動嘅安排，希望可另設小組討論長遠點樣整體發展地區經濟。小組原定運作一年，大埔嘅陳建君就話目前市道仲係麻麻，希望小組來年繼續運作。

新民黨噚日舉辦茶敘，多名區議員分享上任至今嘅工作同未來計劃。郭浩景認為提振地區經濟除咗搞活動，長遠計劃同樣重要，考慮建議區議會再設小組，聚焦長遠整體規劃，例如點樣善用地區特色。陳建君就話，其實各區仍有活動振興市道，例如大埔區將趁國慶聯同商戶提供優惠。

甘文鋒係「跑酷」人 盼增加資源

港隊喺巴黎奧運取得佳績，社會關注運動員資助不足。屯門嘅甘文鋒原來係體操總會跑酷（Parkour）技術委員會召集人，更即場示範喺地面「打筋斗」。佢話跑酷項目所獲資助唔多，運動員代表香港出外參賽都要自費，教練為維持生計要喺唔同地方兼教。佢話雖然政府一直撥款資助運動員同發展體育，但畢竟僧多粥少，希望進一步增加資源。