【明報專訊】巴黎殘奧正式展開，港隊陳睿琳噚日出戰女子S14級100米蝶泳奪得銀牌。前特首林鄭月娥（圓圖）就親身去咗巴黎，為殘疾運動員打氣，亦有到游泳場館觀賞陳睿琳嘅賽事，仲同佢握手道賀。
陳睿琳噚日以破亞洲紀錄嘅時間奪得女子S14級100米蝶泳銀牌，係香港喺巴黎殘奧嘅首面獎牌。直播片段捕捉到林太到場觀賽，見到佢穿上港隊外套喺觀眾席打氣。頒獎儀式結束後，陳睿琳見到企喺觀眾席嘅林太，就上前揮手打招呼，林太亦主動握手道賀。不過就未見林太丈夫林兆波一齊觀賽。
林太目前仍被美國政府制裁，需要停用銀行帳戶、遭禁止入境美國，雖然歐盟並無制裁林太，不過都有網民留言，關注點解法國容許佢入境。
