【Emily】浸大飯堂出租餐具 唔使洗方便還

【明報專訊】繼中大、科大等校園餐廳之後，本地環保社企ReCube將會喺浸大推行重用餐具租借服務，新學期開始後，浸大學生同教職員買外賣時，可以喺善衡校園餐廳通過ReCube嘅應用程式租借重用餐具，用完後可歸還到任何一間合作餐廳，毋須清洗，重用餐具會交畀匡智會碗具清潔培訓中心清洗。

ReCube聯合創辦人徐嘉熹話，公司係大學生創業團隊，當然希望為團隊熟悉嘅校園出一分力量，感染更多同學實踐環保，未來能夠喺更多校園和機構嘅食堂推廣借用餐具服務。

舊年成立嘅ReCube本身係由浸大創新服務學習中心社創共享工作室嘅「社會創新計劃啟動基金」資助，喺浸大一個初創活動奪得亞軍。截至今年8月，借出過1.5萬次重用餐具。