【Emily】赴巴黎殘奧撐港將 前特首辦：林鄭自費

【明報專訊】前特首林鄭月娥正喺巴黎為出戰殘奧嘅港隊運動員打氣，被鏡頭捕捉到後喺網上引起討論。前特首辦回覆Emily話，今次林太係自費去巴黎，屬私人活動，所以不適宜提供其他詳情。

前特首辦就引述香港殘奧會話，自林太擔任社會福利署長以來，一直支持殘疾運動發展，之後無論出任政務司長或特首，林太亦大力支持殘疾運動員，見證佢哋成長，同好多運動員及教練如親人般相處，所以今次親身到巴黎見證佢哋嘅成就。殘奧會又話，林太曾多次用自己假期、自費參與殘疾運動嘅國際大賽，今次巴黎殘奧會亦係自費參與，非常有心。

港隊泳手陳睿琳日前以破亞洲紀錄嘅時間奪得女子S14級100米蝶泳銀牌，直播片段見到林太到場觀賽，穿上港隊外套喺觀眾席打氣，頒獎禮結束後，林太主動握手道賀。