【Emily】百年一遇 潮州商會首迎女會長

【明報專訊】潮州人向來以「重男輕女」出名，有過百年歷史嘅潮州商會最近就打破「傳統」，選出首名女會長。可以打破呢個傳統嘅「百年一遇」女會長，就係全國政協委員、香港意得集團董事局主席高佩璇（圖）。

11月辦國際潮團聯誼年會

高佩璇：將做好超級聯繫人

香港潮州商會1921年成立，舊稱「旅港潮州八邑商會」，係香港歷史最悠久嘅商會之一，一直以來都只有男性會長。但喺今年8月29日，出生於汕頭嘅高佩璇終於「力壓群雄」，成為潮州商會103年來首名女會長。能夠喺一眾「大男人」群中脫穎而出，自有過人之處。

高會長表明任內其中一項工作係做好與內地、特別係潮汕地區，同香港及海外工商界嘅超級聯繫人、超級增值人，包括11月喺汕頭舉辦「國際潮團聯誼年會」，商會都會積極參與，聯繫世界各地嘅潮州人社群，為會員及鄉親拓展商機。