【Emily】推人才義工 孫玉菡：助港漂交友融入

【明報專訊】香港人才服務辦公室噚日舉行人才義工計劃啓動禮，勞福局長孫玉菡話呢個計劃嘅目的係希望來港專才貢獻社會，亦可以結交本地朋友，融入社會。對於點樣喺義工活動運用到人才專業知識，人才辦總監劉鎮漢話要「一步一步嚟」，𠵱家只係一個開始；至於預計參與人數，佢話視乎兩個機構需要，估計都會有幾百人。

劉鎮漢話，人才義工計劃由義務工作發展局、基督教勵行會提供義工平台，香港優才及專才協會同埋「港漂圈」負責搵義工。佢認為活動可以幫人才更快融入社會，擴大交際網絡，又話對日後義工服務類型持開放態度，舉例可以教小朋友普通話，或到單車賽、渣馬等大型活動做義工。

港漂圈：內地多不了解義工文化

被問計劃推行前，來港人才參與本地義工面對嘅困難，港漂圈創辦人趙磊話內地無成熟嘅義工文化，內地人亦普遍唔了解做義工可以令自己成長，希望圈內人透過活動明白「拚命賺錢以外」社會服務嘅意義。香港優才及專才協會主席駱勇就話，協會以往有提供中西醫義診等服務，認為今次同大型機構合作，可進一步推動義工文化。