【Emily】議員11月遷新辦公室 梁君彥囑「斷捨離」 稱大樓擴建進「關鍵期」 空中花園明年初開

【明報專訊】立法會綜合大樓擴建工程如火如荼，立法會主席梁君彥噚日話工程已經進入「關鍵期」，有信心全體議員可以喺11月底起陸續遷入新辦公室。唔少議員稍後都要搬位，梁君彥話，樂見唔少議員及助理已開始整理物品，話佢哋要開始「斷捨離」，重新規劃新辦公室家具同設備佈置。

料月內裝幕牆 月底鋪網

梁君彥噚日與立法會秘書長衛碧瑤視察立法會大樓擴建工地，佢話擴建樓層進度符合預期，預計今個月內完成安裝幕牆及機電設施，月底可以開始鋪設網絡。佢話有信心全體議員可以喺11月底開始，如期由對面嘅中信大廈陸續遷回立法會大樓嘅新辦公室，立法會秘書處已聘請搬運公司負責相關工作。

立法會大樓現有4部𨋢因為要原址加建樓層而停用，令等𨋢時間耐咗，梁君彥話工程本月底之前完成，到時等𨋢時間會縮短。另外，佢話擴建後大樓11樓會設有「空中花園」，將以茶花為主題，預料明年1月開放。至於鄰近政府總部東翼前地嘅「公眾入口2」，就會喺本月完成美化工程，梁君彥話將安裝「醒目」門框、增設LED燈及風扇，改善過往通道光線不足同通風欠佳嘅問題。