【Emily】援留守長者 仁愛堂擬招募培訓義氣仔女

【明報專訊】仁愛堂噚日公布未來工作計劃，其中一項「替假護老者『義氣仔女』培訓先導計劃」會招募和培訓社區義工，陪伴同照顧「留守長者」。仁愛堂話，呢個項目會為家人移民海外嘅「留守長者」、雙老及欠缺支援嘅護老者提供喘息空間。

仁愛堂會培訓替假護老者提供上門看顧服務，但佢哋唔止提供探訪服務，仲包括短暫陪伴、簡易訓練及運動、陪伴外出等。仁愛堂仲話會邀請替假護老者嘅子女一齊成為小義工去探訪長者，推動互相扶持嘅理念。

為期兩年 每年培訓50人

呢項護老先導計劃為期兩年，首階段於九龍城區推行，提供「替假護老者」課程，每年培訓50人，並為100名護老者提供總數5000小時嘅替假服務。

仁愛堂董事局主席鄭偉康噚日帶領眾董事局成員向傳媒簡介工作計劃。除咗護老，今年仲會推中西醫協作嘅「仁愛堂中醫紓緩癌症不適服務計劃」，以及運用240萬元捐款支持慈善牙科服務等。