【Emily】盈盈抱B 滿滿母愛 海園保育基金：歷年90項目護熊貓

【明報專訊】噚日打風，海洋公園喺Ig發放溫馨片段，見到大熊貓盈盈擁抱BB家姐，散發母愛。海洋公園叫大家放心，話即使天氣惡劣，專家同護理團隊會繼續24小時照顧住大熊貓。香港海洋公園保育基金總監祝效忠話，大熊貓一向難於繁殖，盈盈今次誕下龍鳳胎，係為佢哋大熊貓保育工作打咗一劑「強心針」，會拓展大熊貓嘅保育同教育工作。

保育基金亦回顧咁多年嘅大熊貓保育工作，話一直都將大熊貓列為重點保育物種，至今投入超過3000萬元，支持逾90個同野生大熊貓有關嘅保育研究等項目，亦有參與修復多個大熊貓棲息地、人工恢復竹林等，總保護面積超過375平方公里，仲資助培訓內地逾1100個前線人員，協助大熊貓保護區提升管理水平同推動可持續保育措施，又設立咗3條大熊貓走廊，減少棲息地破碎化嘅影響。

保育基金又提到，今年5月結束由昆山杜克大學環境科學助理教授李彬彬博士帶領為期近6年嘅研究，調查咗放牧對大熊貓棲息地嘅影響，直接推動四川王朗國家級自然保護區全面禁牧，仲為村民制定咗替代方案。

𠵱家做緊、都係由保育基金資助嘅項目係追蹤研究大熊貓被放歸後點樣適應野外生活，項目由中國大熊貓保護研究中心副主任李德生領導。