【Emily】參訪了解亞博發展 議員順道逛國際蔬果展

【明報專訊】政府一直推動大型會議同展覽落戶香港，多個立法會議員噚日就參觀亞洲國際博覽館，仲同亞博主席李天柱見面，了解最新發展。佢哋仲趁機參觀咗屬政府盛事嘅國際蔬果展覽Asia Fruit Logistica，引述參展商話希望來年再嚟香港。

到亞博參觀嘅立法會議員包括姚柏良、江玉歡、林筱魯、邵家輝等。亞博目前嘅展覽、會議同演唱會數目已回復至新冠疫情前水平，林筱魯話亞博嘅檔期排滿晒，應接不暇，平均每兩日就有一場演唱會，形容「天天有盛事」。

一行人亦趁機參觀埋Asia Fruit Logistica。呢個展覽有來自40多個國家或地區超過700個展商參與，涵蓋蔬果生產商、經銷商、機械及物流公司等。現場展出各式各樣蔬果，一眾議員仲同大型水果擺設打卡留念。江玉歡話展覽氣氛熱鬧，佢同多個參展商傾談，對方都希望下年再嚟香港。姚柏良就希望當局盡快展開亞博二期嘅擴建工程，紓緩本港會展、文娛活動場地不足問題，鞏固盛事之都地位。