【Emily】教局拍MV賀國慶 發通告叫學校跟住唱

【明報專訊】全港學生近期有好多機會大合唱。​愛國主義教育工作小組日前推出愛國歌曲《我們的家》，由人大代表鄺美雲主唱，仲會派歌曲嘅USB畀學校，叫學生一齊學唱。教育局噚日亦有類似安排，話為慶祝75周年國慶，製作咗《同心築夢》MV，叫大家跟住唱，透過勵志歌詞，培育學生嘅價值觀同態度。

《同心築夢》MV製作認真，教育局長蔡若蓮話係由超過100個來自唔同學校嘅學生參與演唱同拍攝，仲話首歌旋律輕快、歌詞勵志動人，希望學生能夠有感。歌詞其中一段係「攜手向着太陽，狂風雨驟至都撐得起，共互愛尊敬，合力再爭勝，繼續拼勁」。

教育局已向學校發通告，呼籲學校喺周會、早會、德育或成長課、班主任課、全方位學習活動日，又或開學禮等活動中播放，仲話適合做畢業班嘅主題曲。局方仲話會舉辦「唱我們的歌《同心築夢》歌唱比賽」，進一步推動師生認識同實踐團結價值觀。