【Emily】朱國強任職校塌樹 匿樹窿貓頭鷹獲救

【明報專訊】超強颱風「摩羯」襲港期間有唔少塌樹，包括立法會議員朱國強擔任校長嘅打鼓嶺嶺英公立學校門前有大樹倒塌，朱噚日喺facebook專頁話好彩塌樹位置係空地，無波及民居同校園設施，亦無人受傷，而消防員到場處理塌樹時，就發現樹洞內有一隻疑似受驚嘅鵂鶹。翻查資料，鵂鶹即係無角羽嘅貓頭鷹，朱國強話呢隻鵂鶹會送去嘉道理農場檢查同護理。

送嘉道理護理 朱：見過BB兩三次

朱國強喺fb話，有時會見到未識飛嘅鵂鶹BB喺附近樹枝上行來行去，非常可愛。佢同Emily講，鵂鶹比較怕人，平時唔常見到，即使見到都只係剛長羽毛嘅BB喺樹枝間左行右行，所以佢都只係見過兩三次。噚日消防員清理塌樹發現鵂鶹嘅時候，朱校長本人唔在場，係學校同工見到再話佢知，而據佢了解，鵂鶹已被消防員送走，應該會送去嘉道理農場。

睇番資料，鵂鶹喺香港算常見，佢嘅頭部係球狀，虹膜呈黃色，上體有褐色橫紋，主要棲息於林區，有時會喺日間活動，以昆蟲、鼠類、蜥蝪及其他小動物為食物。