【Emily】狄志遠收陳國基信息 預早知落8號波時間

【明報專訊】超強颱風「摩羯」襲港期間，打工仔最關心應該係幾時落8號波，喺天文台公布消息前，社福界立法會議員狄志遠朝早上電台節目就透露，已收到政務司長陳國基嘅WhatsApp信息，話當日下晝1點前會落8號風球。狄志遠就話，政府係向議員交代工作，有少少「預告」，唔覺係正式發布。

前日亦收掛波預告 較市民所知更準

狄志遠噚日朝早喺商台節目《在晴朗的一天出發》話，陳國基都有交代因風暴受傷求診嘅人已出院，並無大礙。阿狄仲話，前日朝早9點幾亦收過司長私訊，話當日晏晝5點半到6點半會掛8號波。天文台當時嘅最新資訊都係預計4點至7點掛8號波，即係話狄志遠比一般市民更早收到風暴信息，時間範圍亦更準確。

阿狄話相信其他議員都收到信息，佢話呢種做法唔係好頻密，今年5月紅雨警告生效時，陳國基亦曾私訊佢講解各部門具體分工。