【Emily】黃大仙祠辦開筆禮 170學子學做「人」

【明報專訊】開學一個禮拜，嗇色園黃大仙祠噚日第六度舉辦「萬世師表孔聖先師啟蒙開筆禮」，有超過170名學子身穿傳統儒服參與，喺老師指導下執筆學寫「人」字，象徵讀書學習知識之前，要先學會做人處事，成為頂天立地、堂堂正正嘅人。

「開筆禮」係古代人生四禮之一，又稱「破蒙」，作為中國傳統中對少兒啟蒙、開始識字習禮嘅儀式。噚日儀式開始前，先由主科道長帶領上香，再由眾道長誦讀《黃大仙師寶訓》，主禮嘉賓、長春社高級保育經理黃競聰之後為一眾學子「擊鼓鳴志」，表明自己志向。學子隨後恭領經嗇色園高功法師喺科儀中誦經開光同灑淨嘅證書及毛筆，祝願佢哋學有所成。

學子最後要向孔聖先師上香同敬拜行禮，再由黃大仙祠監院李耀輝（義覺）道長逐一以硃砂點痣喺學童額頭正中，寓意為孩童開啟智慧，從此眼明心亮。