【Emily】亞洲秘蜻現東涌河 香港首見

【明報專訊】東涌河係香港碩果僅存嘅大型天然河流，孕育好豐富嘅物種，綠色力量8月底做恒常蜻蜓調查時，喺東涌河口一片濕地發現「亞洲秘蜻」，係呢個物種喺香港首個紀錄。不過，綠色力量高級保育經理呂德恒話，發現嘅位置喺東涌谷分區計劃大綱圖內住宅（丙類）用地邊陲，擔心蜻蜓棲息地會受住宅發展影響，促政府加強保育區內自然生態，尤其避免涉及濕地生境嘅土地改劃。

亞洲秘蜻廣泛分佈喺熱帶亞洲同澳洲北部，雲南、海南、台灣亦有紀錄。呂德恒話，雄性亞洲秘蜻頭部前方呈乳白色，額有褐色斑，胸部褐色，腹部鮮紅色，最末端黑色；上月錄得嘅個體，胸部有明顯灰白色粉霜覆蓋，係較成熟嘅雄性個體。

環團憂市鎮擴展危棲地

佢話東涌河係本地一個最重要嘅蜻蜓棲息地，佢哋2012年喺度做蜻蜓調查至今累積記錄逾60種蜻蜓，佔全港蜻蜓物種近半，當中不乏具保育價值物種，期望東涌西新市鎮擴展工程減少對河道生境影響，盡量保留東涌河同河口嘅天然面貌。