【Emily】黃大仙賀誕 「過海」灣仔無人機匯演 3周非遺綵燈節 近百場表演

【明報專訊】中秋節前後，香港唔同地方都有特色活動畀市民及遊客參與。嗇色園為慶祝黃大仙誕及國慶75周年，舉行為期3周嘅嗇色園非遺薈萃綵燈節，其中9月15日（周日）會有「黃大仙師出巡」儀式。而黃大仙仲「跳出」當區，9月21日晚會過海到灣仔海濱，以無人機匯演展示黃大仙信俗。

嗇色園董事會主席黎澤森話活動期間祠內外展示多組大型紮作花燈，亦以「非遺」做主題，邀請內地及香港共20多個非遺傳承單位，連日舉行近百場表演。整個綵燈節期間，即9月15日至10月6日，黃大仙祠每日延長開放至夜晚9點，而中秋夜（17日）更延長至11點，追月夜（18日）就延長至10點。

康文署噚晚亦為中秋綵燈揭開序幕，尖沙嘴文化中心露天廣場水池亮起《月上龍宮》綵燈。9月12至18日，維園同青衣公園都有唔同主題嘅綵燈展。

港鐵中秋夜通宵行駛

港鐵公布將喺中秋節當晚加強服務，所有本地鐵路（唔包括機場快線、迪士尼線及東鐵線來往羅湖或落馬洲站車程），以及部分輕鐵路線（包括505、507、610、614P、615P、706及751）會通宵行駛。