【明報專訊】香港郵政將推出「兒童郵票──中國成語故事III」特別郵票，共有6枚，今個月26日正式發售。郵政話成語典故多源於歷史同生活，有文化內涵又有人生哲理，郵票透過生動繪畫，增進兒童對中國成語故事嘅認識同興趣。
郵政2006年同2011年都發行過「中國成語故事」郵票，今次係第三輯。呢6個故事多數係歌頌美德，例如「畫荻教子」係講「一代文宗」歐陽修細個時，阿媽因為買唔起紙筆，用蘆葦桿喺沙地教佢寫字。另外5個故事分別係磨杵成針、胸有成竹、克勤克儉、披荊斬棘、未雨綢繆。
全套6枚郵票賣23.6元，其他集郵產品都可以喺郵政網站搵到，而今日會先發售首日封。
