【Emily】葉劉寧波考察永新光學 憶故友曹光彪賞識

【明報專訊】新民黨主席葉劉淑儀同幾個黨友上星期去咗寧波考察，參觀當地新質生產力企業、港口及旅遊景點，葉太話今次係獲好朋友曹其東邀請，而曹其東先父曹光彪同葉太更係忘年之交。葉太記得當年做保安局長，曹老先生同一眾蘇淅企業家都非常支持，到葉太喺美國讀完書返香港創辦匯賢智庫，曹老先生都親自到場支持。

葉太話，曹光彪等江浙滬企業家，包括香港首任特首董建華嘅先父董浩雲、從事船務及運輸業起家嘅包玉剛等，同樣喺上海做生意同發迹，解放後帶同技術及資金輾轉來港。曹光彪最初從事紡織業，其後同包玉剛等人創立港龍航空，並發展成今日嘅永新企業。

葉太提到，曹老先生去世後，所有個人財產捐畀清華大學，子女就各自發展，永新光學由曹其東負責，𠵱家已成為國家光學精密儀器及核心零件製造商、國家級高新技術企業、光學顯微鏡國家標準製訂單位等。