【Emily】林世雄訪杭州「城市大腦」 了解用大數據減擠塞

【明報專訊】運輸及物流局長林世雄正同立法會交通事務委員會嘅議員喺杭州考察，運輸署長李頌恩都有隨行。噚日係長三角考察行程嘅最後一日，代表團上晝先去杭州城市大腦運營指揮中心，了解點樣應用「城市大腦」，例如透過分析大量數據，實時計算交通優化方案，包括調整交通燈時間提高交通速度。

之後代表團參觀當地一間大型汽車生產商嘅總部，睇下新能源車嘅研發及使用，林世雄都有試坐。

代表團之後同杭州市交通運輸局代表會面，就交通管理、新能源車發展及綠色運輸等議題交流。林世雄話​港府喺智慧出行策略下推行一系列措施，例如推出「易通行」不停車繳費服務、自動泊車系統、設立10億元智慧交通基金資助本地機構等。代表團參觀完由機管局自2006年起參與營運管理，並擁有部分股權嘅杭州蕭山國際機場後，就結束行程返港。