【Emily】馬會拉隊探訪 江旻憓「攜金」𧨾長者

【明報專訊】聽日中秋節，賽馬會超過200個義工上周末去咗深水埗，探望一班獨居長者同雙老家庭，上個月先加入馬會擔任對外事務助理經理嘅巴黎奧運女子個人重劍金牌得主江旻憓（Vivian）亦參加咗佢入職以嚟首次馬會義工隊活動。Vivian除咗派福袋，仲帶埋個奧運金牌畀佢探訪嘅長者睇，𧨾得老人家好開心。呢位老友記之後戴住Vivian塊金牌，兩個人擺出心形手勢合照。

提醒食月餅勿忘做運動

Vivian話，探訪期間印象最深刻嘅係住喺唐樓嘅長者出入要行8層樓梯，對於年紀大及曾接受手術嘅老人家嚟講絕對唔容易，又話新冠疫情期間唔少長者身邊都有朋友離世，情緒大受影響，所以希望多啲關懷一眾老友記，亦期望將來參與更多唔同類型嘅義工活動。Vivian不忘祝福大家中秋節人月兩團圓，佢三句不離運動員本色，提醒大家食月餅嘅同時，記得要多做運動咁話。