【Emily】曾俊華推介二戰史料展覽 從中國軍人日記看D-Day

【明報專訊】中環藝穗會正舉辦「唐樓中的二戰日記：從香港見證歐洲戰場的中國身影」展覽，前財政司長曾俊華日前去咗參觀，並同策展嘅年輕人交流。曾俊華推介展覽，話展出嘅史料，記錄咗中國軍人參與「諾曼第登陸」等二戰戰事嘅經過，以及戰後香港復蘇等重要歷史片段。

展覽展出24名參與「諾曼第登陸」（D-Day）嘅中國軍人之一、中國海軍軍官林炳堯嘅日記、書信等。曾俊華喺facebook分享展覽源起，話戰後參與D-Day嘅中國軍人各散東西，林炳堯就隨英國「鐵甲行動」運送物資來港，之後定居香港；直到幾年前，有人喺西環一幢即將拆卸嘅唐樓，發現林炳堯嘅日記、一疊書信同一把東洋刀等，經過歷史學者鑑定發現係中國人參與D-Day嘅一手史料，十分值得收藏同研究。曾俊華形容，機緣巧合下，林炳堯為下一代遺留咗一段重要嘅歷史片段。

展覽即日起到星期四（19日）於中環藝穗會舉行，下周一（23日）到年底移師中文大學嘅大學圖書館展出。