【Emily】今明驟雨多雲 賞超級月亮留意

【明報專訊】聽日就係農曆八月十五，天文台話，今年嘅中秋節傍晚5點58分月出，晚上11點57分月亮會升至最高點，第二日早上6點02分月落。由於月球會喺中秋節同翌日運行至「近地點」，即最接近地球嘅位置附近，如果天氣情况許可，市民會觀賞到又圓又大嘅超級月亮。天文台話視覺上月亮直徑會較平均大7%左右，另外會有土星合月嘅天文現象，滿月旁邊會有肉眼可見嘅土星。

月球達「近地點」 眼見直徑大7%

今年中秋節嘅滿月，會喺中秋節翌日早上10點34分先至出現，當時月球會喺香港地平線以下，若身處香港，就無緣一睹飽滿嘅滿月喇。滿月時，南美洲、北美洲大部分地區、歐洲、非洲、亞洲西部等地亦將出現月偏食，但香港同樣睇唔到。不過天文台話，月球都會喺中秋節同翌日運行至「近地點」，月球同地球距離只有35.7萬公里，屆時肉眼可見嘅月亮，其直徑會較平均「大」約7%。

搵定靚位賞月都要留意天文台天氣預報，以便安排賞月活動，天文台預測今明兩日香港大致多雲，有幾陣驟雨，Emily就希望到時天公作美啦。