【Emily】技能界奧運 燒焊細木兩將奪優異獎 港隊歷屆最佳成績

【明報專訊】行行出狀元，建造業議會派出7名後生仔，參加喺法國里昂舉行、有「技能界奧林匹克」之稱嘅世界技能大賽，仲帶來好消息。焊接項目嘅周樂燃及細木項目嘅方俊諺同獲優異獎章，為港隊歷屆最好成績。其中方俊諺得知獲獎章後喜極而泣，話能夠代表香港參與國際比賽係難忘嘅人生體驗，令佢學識唔好因為失誤而放棄。

一連四日嘅第47屆世界技能大賽喺9月15日結束。建造業議會7名代表，分別為混凝土建築選手陳俊希及曾希藍、細木選手方俊諺、油漆及裝飾選手吳雲帆、管道及製暖選手陳晉廷、鋪瓦選手戴嘉俊，以及焊接選手周樂燃。佢哋各自與唔同地區參賽者切磋技能，而港隊專家及訓練員都會每日同隊員賽後檢討及分析表現。

18個鐘做8焊接物 周樂燃：處事更成熟

比賽都幾考耐力㗎，Emily睇番資料，焊接項目參加者要喺兩日半嘅賽程，用18個鐘頭完成8件焊接物，包括喉管、不鏽鋼製件等，測試6種接焊方法。焊接選手周樂燃得知獲得優異獎章後亦好激動，話感激公司支持佢出賽，並感謝專家及訓練員教導及照顧，又話能出戰世界賽令佢人生蛻變，做人處事變得成熟。建造業議會話，今次係港隊連續兩屆喺焊接項目獲得優異獎章。