【Emily】張宇人搞創意名菜大賞 參賽者須分享食譜

【明報專訊】本地飲食界近月生意唔好，個個叫苦連天，業界最近就聯手合辦第一屆「金筷子明火創意名菜大賞」。發起人之一兼飲食界立法會議員張宇人話，參賽者要同意賽後分享食譜，其他公司日後都可參考，造福全行。佢又提到今次搞比賽嘅原因係業界人手嚴重短缺，要廚師諗有創意嘅菜式，畀客人新鮮感都唔易，「好多廚房5個位得3個人做，同事已經做得好辛苦」。

比賽會分4個種類，分別係肉類、家禽、海鮮、素菜，菜式一定要係中菜；每個種類各設金銀銅獎，優異獎可能多於1個，各有現金獎，張宇人話獎金金額稍後公布；比賽今日至10月底可報名，12月12日舉行決賽兼頒獎。佢提到，比賽會以公司做單位，因為菜式創新唔應該只由廚師去諗，尤其現時人手不足，「老闆、管理層都有責任」，應以團隊形式創作菜式。

對於近期商戶結業，身兼行會成員嘅張宇人認為，2009年起本港食肆出現過度膨脹，𠵱家係調整期，業界都要了解自身有無能力持續經營，例如投資新食肆就要三思，「今年唔租，出年業主都會租畀你，舖租就會平啲，咁急做乜呢？」