【Emily】經民聯派月餅 盧偉國奏色士風

【明報專訊】經民聯噚日中秋節喺中環擺街站派月餅，同市民慶中秋，同時為市民、商戶「打氣」，主席盧偉國仲出動「私伙」，拎埋一支鑲滿閃石嘅「鑽石級」色士風到場演奏多首經典歌曲，包括《月亮代表我的心》、《順流逆流》等。

盧偉國話，經民聯一直重視經濟、民生，所以將該黨全國人大代表、政協委員、立法會議員、區議員及商會領袖嘅優勢結合，加強地區治理。副主席梁美芬就希望香港百業興旺，又話香港目前仍潛藏巨大優勢及動能，各界需要保持「獅子山下」嘅精神，齊心推動經濟發展。

經民聯執委會成員、地產建設商會秘書長龍漢標就好鬼馬，盧偉國一面吹奏《月亮代表我的心》，龍漢標就喺旁邊將歌詞改做「中秋節快樂」，伴唱咗幾句，佢又話𠵱家經濟比較困難，但噚日陽光猛烈，係象徵香港前途光明咁話。