【Emily】國慶巴士巡遊 長牛大食鬼「復出」

【明報專訊】為慶祝國慶，運輸署聯同3間巴士公司下月19日會舉行巴士巡遊，仲有一連4日嘅展覽。巡遊當日早上10點幾開始，九巴嘅丹拿E型（俗稱「長牛」）、城巴嘅「復古大食鬼」，同埋嶼巴嘅「白綠金色ADL雙層巴士」會由維園出發，沿港島北岸行走，終點係中環碼頭，歷時約20至30分鐘，市民到時可沿途觀賞。

維園展新舊巴士周邊品

今次活動主題係「巴士往昔，拾一回憶」。運輸署話希望同市民一齊回顧專營巴士過去75年嘅發展，所以巡遊後同日下午會喺維園足球場舉行展覽，由10月19至22日展出幾架退役同現役巴士，包括最新引入嘅新能源巴士，仲有各種同巴士服務有關嘅新舊物品，例如員工制服、懷舊巴士車票等。市民如果想參加，可以喺Cityline購票通（www.cityline.com）登記預約參觀日期同時間，今早11點開始接受登記索取免費展覽入場券，先到先得。

另外，運輸署噚日亦話已經收到部分巴士公司提交嘅加價申請，會按既定程序審核，無透露佢哋提出嘅加價幅度。