【Emily】佳士得亞太總部開幕 莫內梵高拍品響頭炮 估價兩三億

【明報專訊】佳士得嘅全新亞太區總部噚日開幕，佔地5萬平方呎，第一個現場拍賣會下周四（26日）舉行，其中「二十及二十一世紀藝術晚間拍賣」將拍賣46件藝術品，包括兩大印象派大師莫內嘅《睡蓮》同埋梵高嘅《停泊的船隻》，後者估價高達2.3億至3.8億港元。

《睡蓮》125年首現拍賣場

《睡蓮》係莫內較早期嘅作品，約喺1897至1899年畫，過去幾十年先後喺歐美嘅美術館、博物館展出，今次係作品125年來首次現身拍賣場，估價2億至2.8億港元。至於梵高作於1887年嘅《停泊的船隻》係超過30年後重現拍賣場。

同場拍賣品仲有馬格利特嘅《先見之明》，創作於1943年，將唔可能共生嘅花畫喺同一棵植物，佢曾經話過，作品係對二戰嘅恐怖及家鄉布魯塞爾被德國佔領嘅回應。常玉嘅《曲膝白色裸女》、金煥基嘅《9-XII-71》、趙無極嘅《05.06.80 – 三聯作》等都係焦點拍賣品。

晚間拍賣前，將首先拍賣收藏家區百齡嘅珍藏，包括19件中國名瓷。兩個展覽嘅公眾預展喺9月22日至26日舉行，須先預約。