【Emily】寶蓮寺貼大細妹重逢照 數百網民畀嬲 質問「炒咗棄狗者未」 翁靜晶：盼由有心人領養

【明報專訊】大嶼山寶蓮禪寺內兩隻唐狗「大妹」同「細妹」，上月中被員工用袋笠頭棄置兼下落不明，繼「細妹」早前搵番，失蹤個幾月嘅「大妹」前日亦被「毛守救援」嘅義工搵到。寶蓮寺噚日就喺facebook上載「大妹」同「細妹」重逢嘅相片，話已經搵番「大妹」。

寶蓮寺：續觀察治療大妹

據寶蓮寺講，前日接到警方通知搵到疑似「大妹」，經愛護動物協會驗血檢查同確認後，就帶咗「大妹」返寺院原有棲息處，話「大妹」日後會持續接受觀察治療。寺方感謝各界團體、義工同有心人連日自發尋找。

不過，佢個帖文發咗半日已有四五百個網民派「嬲」，唔少人留言話唔贊成將大細妹交番畀寶蓮寺，仲要求寺方交代兩隻唐狗嘅主人係邊個、問炒咗當日棄狗嘅人未，關注事件嘅律師翁靜晶亦喺個人facebook話希望可以由有心人領養「大妹」，唔好送返寶蓮寺；佢仲話兩隻狗本身有晶片，主人係同寶蓮寺相關嘅人，質疑點解寺方一開始要講大話，話佢哋係流浪狗，要求交代到底邊個係佢哋主人。