【Emily】環境局製《美麗香港》專題片 頭炮介紹海灣物種

【明報專訊】環境及生態局長謝展寰噚日喺網誌話，局方和環境保護署，聯同國家生態環境部宣傳教育中心製作咗《遇見美麗中國》和《美麗香港系列》專題片，其中《美麗香港系列》專題片有5集，首集播出嘅係以「美麗香港海灣」為題的專題片。謝展寰又引用國家主席習近平提出嘅「綠水青山就是金山銀山」理念，話呢系列短片展現國家一直高度重視環境保護與經濟發展之間嘅協同關係。

香港有幾多種石珊瑚？「美麗香港海灣」短片就提到香港有來自28個屬84種造礁珊瑚品種，話比整個加勒比海嘅總和更多。謝展寰又話，香港海域總面積超過1600平方公里，海岸線長約1200公里，雖然只佔全國海洋面積不足1%，但就擁有多處美麗海灣及全國四分之一嘅海洋物種，當中包括中華白海豚、江豚、綠海龜、馬蹄蟹及珊瑚等。局長又話，香港東面嘅大鵬灣及牛尾海水域水質長期保持優良，有海綿、珊瑚及珊瑚礁等海洋生物，該水域已設有3個法定海岸公園，以加強保護。

專題片稍後會喺香港電台電視32台播出，並會派發畀全港中小學播放。