【明報專訊】中文大學校友會聯會前晚正式舉行換屆交職儀式，搵嚟一位勁人做新一任會長，佢就係前三項鐵人運動員李致和。聯會前晚喺中大善衡書院宿舍舉行儀式，場面熱鬧，西裝筆挺、仲keep得好fit嘅李致和，喺46屆會長張福英手中接過聯會襟章，就任47屆會長。
李致和1999年從中大運動科學系畢業後轉為全職運動員，贏得唔少三項鐵人賽事，包括2006年多哈亞運會銀牌、2009年全運會銅牌等。隨後佢繼續進修，2013年取得中大教育碩士，2019年取得中大教育哲學博士。李致和之前已參與聯會工作，喺上屆聯會代表會擔任秘書一職。
