【Emily】教局《喜閱一生》推介心靈書 作者話愈快樂先會愈成功

【明報專訊】教育局推《喜閱一生》短片，搵各界人士介紹好書，教育局長蔡若蓮噚日喺社交媒體幫手宣傳，話最近推出咗3條短片介紹3本好書，都可以喺公共圖書館借閱。今期推介嘅3本讀物其中兩本同心靈健康有關，包括繪本《OH…我好害怕…》及《The Happiness Advantage》。蔡若蓮話書能夠啟發智慧，讓我哋了解快樂嘅真諦。

蔡若蓮：閱讀助悟快樂真諦

教育局搵嚟3名教育界人士推介讀物，其中呂婉婉校長介紹《OH…我好害怕…》，故事講述一輛熱情嘅小巴士首次出任務，但被城市嘅聲音同動物嚇倒。呂校長話，同小朋友睇書時，家長作為成人可以引導小朋友思考，有咩方法可以解決，點樣可以一齊踏出勇敢第一步。佢話家長可以鼓勵小朋友唔需要羞愧，將害怕嘅情緒表達出嚟。

教育局總課程發展主任李建寰就推介哈佛大學Shawn Achor著作《The Happiness Advantage》，話作者綜合咗一啲研究，發現結果同我哋一般人嘅想法唔同，指一般人經常以為愈成功先會愈快樂，但其實愈快樂先會愈成功，即係話心情開心啲，做事都會做好啲。

盧鳴東教授就介紹《弟子規》，話通過領略古人智慧可幫助我哋找到人生方向。