【Emily】港鐵45歲嘉年華 玩模擬駕駛睇維修車隊

【明報專訊】港鐵今日起至星期日（29日）一連5日喺中環海濱舉行45周年嘉年華「Chill Fun鐵路樂園」，分為五大園區，其中市民可以親身坐上全港首個戶外車長訓練模擬駕駛室，體驗駕駛列車，另設充氣滑梯、迷宮、攤位遊戲等，亦可買代幣玩以鐵路做主題嘅機動遊樂設施。

除咗玩樂設施，現場亦有多個打卡點，包括港鐵首次公開展出維修車隊，包括電動牽引車、輕鐵路面路軌兩用車等，場地中央亦會有一列巨型充氣列車。

另外，場內每晚都有小食攤位同音樂表演，最後一晚會有歌手張敬軒現場重新演繹陳百強嘅經典金曲《幾分鐘的約會》，等大家可以一齊回味「地下鐵碰着她」嘅回憶。

港鐵早前喺MTR Mobile App開放市民預先登記嘉年華最後兩日（周六周日）嘅場次，港鐵噚日話呢兩日場次已爆滿，但平日毋須登記可以免費入場，每日下午1時至晚上9時開放。