【Emily】迪士尼門票今加價 老幼年票收費劃一

【明報專訊】香港迪士尼樂園門票今日起加價，成人及小童一日門票加約5%至7%，加價後節日入場差唔多要成千蚊，全年最繁忙特定日子嘅成人票由879元加到939元，整體而言成人票由639至879元，加到669至939元，小童票就由475至659元，加到499至705元。迪士尼話同時會推特別優惠，11月28日前仍然可用原價買到一日門票。

11‧28前買一日門票計原價

「奇妙處處通」年票會員計劃同樣加價，成人卡加約7%，由1468至4678元，加到1568至4998元；至於小童／學生／長者類別嘅「奇妙處處通」就由今日起有新安排，3類會籍變為同一價格，最平嘅銀卡1178元，最貴嘅白金卡3748元。睇番資料，對小童同學生嚟講，劃一收費後加幅介乎3%至13%，但老友記就唔同，因為長者會籍本身收316至890元，加價後不論銀卡、金卡定白金卡加幅都高達約3倍。迪士尼就話將小童同長者歸同一類，係香港同鄰近地區主題樂園同景點嘅一貫做法。

老友記如果只想玩一日，滿60歲持「樂悠咭」買門票繼續只需100元，迪士尼亦宣布長者一日票同「奇妙處處通」嘅會籍年齡限制由65歲降至60歲，預計更多長者受惠。