【Emily】中史自學平台大變身 遊戲冷知識添趣

【明報專訊】為配合初中推行中史科，教育局噚日宣布，今個月20日起全面啟用「想•創•中國歷史——學生自學平台」。局方話平台已沿用4年，但𠵱家將版面及功能大變身，設11個自學課題，每個課題都有動畫、小遊戲、冷知識同互動問答，內容由歷史學者同資深教育專業人士合作編寫同設計。

教育局話學生喺學習過程中會有積分同排名，希望增添自學嘅趣味同動機，又話平台上亦設有「喜閱歷史」自學專區，提供唔同主題閱讀篇章，「拉闊學習資源區」就為師生推介多元化嘅學習材料。局方話師生都必須透過香港教育城帳戶登入自學平台，網址係：e-chist.com。

平台其中一個中史課題講述秦漢時期嘅造紙術同天文儀器發明，冷知識提到，東漢張衡發明嘅渾天儀可以透過演示星體運行位置，編定曆法、預測氣候，據說有次地動儀朝隴西方向吐出「龍珠」，但當時身處京師嘅官員冇感受到震動，所以唔信張衡嘅儀器可以測地震，但幾日後真係有人通報曾經地震，令人讚歎有呢項發明。