【Emily】試行過海101線一月 城巴氫巴十一免費搭

【明報專訊】城巴氫能巴士今年2月起喺九龍區3條路線試行載客，城巴噚日公布，下周二（10月1日）起氫巴會轉投過海路線做測試，喺往返堅尼地城同觀塘裕民坊嘅101號線提供恆常服務，預計為期約一個月。

當日城巴會舉辦「新能源巴士免費體驗日」，101號線除咗會有氫巴服務，亦都會有電巴行駛，由兩款環保巴士提供嘅班次會免費載客，市民可以喺城巴App留意住實時資訊，睇睇邊啲班次由氫巴同電巴行駛，一日內免費試搭齊兩款巴士。

另外，下周二適逢係十一國慶日，為鼓勵市民出遊同留港消費，城巴當日推出小童免費乘車日，4至11歲嘅小朋友用小童八達通或者其他城巴接受嘅電子支付工具可以免費搭車，優惠適用於全港逾300條日間路線。