【Emily】田北辰首演舞台劇教英文

【明報專訊】一連三日嘅第6屆「兒童書展暨超級親子用品展」噚日喺亞博閉幕，其間實政圓桌立法會議員田北辰首次出演「舞台劇」，化身「田叔叔英語閱讀計劃」故事主角「田叔叔」同埋飾演偵探（圖），同台下觀眾一齊「調查」一宗農場失竊案，搵出偷咗農場雞蛋嘅真兇。田二少話小朋友除咗學到英文，同時明白誠實嘅重要，亦希望通過舞台劇為小朋友帶來輕鬆愉快時光。

田二少自2019年自資推出「田叔叔英語閱讀計劃」，向有需要學童免費提供英文故事書同電子點讀筆，畀小朋友學習地道英文同純正發音、教導正確人生觀等。計劃對象涵蓋幼稚園K1至小學一年級學童，至今超過10萬個家庭受惠；今年9月招募新學年入讀幼稚園K1學童參與計劃，至今逾6000個家庭登記。