【Emily】法國科學節主題海洋 可體驗VR潛海

【明報專訊】法國科學節一向係法國科學界嘅年度盛事，過往活動涵蓋腦震盪、生物多樣性、運動等主題。今年嘅主題係「海洋深知」，法國駐港澳總領事館連續5年聯同香港科學館，即日起舉辦連串免費活動，除咗有展覽睇，仲有VR體驗同電影放映。

科學館舉行 至10．14

活動由即日起至10月14日喺香港科學館舉行，重頭戲包括「海洋：新礦物寶藏？」展覽，多塊展版詳細講述現時各國為咗尋找鎳、銅、錳等生產電池嘅金屬礦物，開啟咗深海採礦斟探計劃。同場仲有《與海豚共舞》VR體驗，參加者戴住VR眼鏡，可以睇到3段全方位360度嘅虛擬實境，同自由潛水員一齊「潛入」海底探索。

康文署副署長（文化）譚美兒噚日喺展覽開幕禮話，香港三面環海，由唔起眼嘅漁村變到國際大都市，印證海洋對香港發展至關重要，鼓勵市民保育海洋。

展覽同VR體驗均對外開放，憑科學館展覽門票、全日制學生或有效博物館通行證嘅市民可以免費參觀。至於講述法國海洋探險家故事嘅《重返碧海藍天》電影放映會就要提早網上報名。